Heten ohan hinpampun an ma'alih Association of Ifugao Bible Churches ya nete"ah nan madinuntug an babluy ad Batad. Ya dumalat nan nidugah an pamhod Apo Dios hinan iAdyang ya hennagnah Len Newell (Bullay) oha an missionary an iCanada. Dida ay ihawana an hi Doreen, ya immuyda ad Batad an ta"on un atata'ot nan owon an miyuy hidi. Nun'ammadah abungdah di ta ni'hitudah naniBatad. Ya ta mi'yul'ulguddah nan tatagu ya mahapul an adalonda nan hapit di iBatad. Ya umat goh hinan ugalin di tatagu an mahapul innilaonda. Ya naluh di atnay tawon ya inilada mahkay nan hapit di iBatad, ya ente"adan ibalin nan English an Bible hinan hapit an Batad. Nidugah di wagah Apo Dios ay dida at lempahda nan tamuda an nangibalin hinan New Testament. Hidin July 1977 ya nidedicate nan Hapit Apo Dios.
Ya nite"an de ya ma'awatanda mahkay nan itudun nan Hapit Apo Dios at kimmulud din udumna ya nabonyaganda goh. Ya immuy din udum an kimmulug an pohdondan ipa'innilah nan udum an tataguh nan udum an babluy nan Hapit Apo Dios.
Ya unat goh agguy nadnoy ya wadaday nahnag an ma'alih coulporter an immuy nunle'le'od ta ulgudondah nan tatagu nan aad di pamhod Apo Dios. At dumalat hene ya do'ol di himba'an an inyamman di kimmulug. At nun nomnomda an mun'ammah a'amungan nan leaders ya nan udum an manudtudu ta mausal hi pun'adalanda. Ya heten organization ya ma'alih Association of Ifugao Bible Churches an ma'ah upan hi Sanafe, Lamut, Ifugao.
Len Newell. Main Translator hi New Testament
Diday translators hi Ayangan Bible (mite'a hi iggid ta umuy hi aggua) Anita Laya, Henry "Bukkay" Guimbong, Dolores Punghan. Nan mi'id hi latlatu ya da Francis "Bon'og" Poligon and Josie Ngittit.
